A Concellería de Medio Ambiente presentou o luns 17 de marzo a edición de Primavera 2025 de Camiño a Camiño na que están previstos percorridos medioambientais, actividade nas hortas urbanas e diversas actividades de voluntariado, segundo se recolle na programación máis abaixo. Tamén están previstas accións formativas relacionadas coas hortas urbanas e co voluntariado
Para o primeiro percorrido medioambiental a celebrar o día 30 -e que percorrerá a Senda Azul do Lagares dende Cabral ata Castrelos- empeza a inscrición o luns 24 de marzo no 010 (986810260 dende móbil).
As hortas urbanas e o voluntariado medioambiental arrancarán a partir do martes 25 de marzo para as persoas inscritas de anos anteriores. O voluntariado de acompañamento de cans xa leva funcionando dende febreiro.
Os cursos de hortas urbanas terán lugar entre o 1 e o 3 de abril nas respectivas hortas e o curso de iniciación ao voluntariado terá lugar o mércores 26 de marzo pola tarde nas instalacións de Vigo Nature. A inscrición xa se pode realizar no 010 ata a data previa aos respectivos cursos
Na programación que se achega atópase un resumo das actividades previstas.
