Primeiro percorrido do ano: o clásico polos humedais

Escomenza a tempada de percorridos da Concellería de Medio Ambiente e, como ven sendo habitual, facémolo polos humedais de Vigo. Hoxe 2 de febreiro é o Dia Mundial das zonas húmidas e Vigo ten un patrimonio neste senso moi destacado.

Como ven sendo habitual, haberá un percorrido curto e outro longo, para que así nos vaiamos aclimatando pouco a pouco (ver detalle a continuación). 

A inscrición terá lugar no 010 entre luns e mércores (para os non empadroados será o xoves) e, como o percorrido é en Vigo, será gratuíto. Únicamente será preciso estar o domingo as 9:00 na Praza do Rei para recoller o ticket.

O Concello de Vigo leva realizado no último lustro un traballo exhaustivo de catalogación, así como accións de protección e de divulgación das zonas húmidas. No termo municipal cóntase cunha extensión de 314.000 m2, destacando en augas doces A Bouza, Goberna, Muíños, A Bao, Fontes-Pertegueiras e Barreiro, e en augas salobres a Xunqueira do Lagares. Ver fichas divulgativas premendo eiqui.

Ás actuacións que realizan habitualmente as cuadrillas municipais, dende o ano 2012 engadiuse o traballo desenvolto polo voluntariado de Camiño a Camiño no tocante á eliminación de plantas invasoras e lixo e á plantación de especies autóctonas nos terreos libres de exóticas. Tamén foi de salientar as accións que se leva con centros educativos de Vigo próximos ás zonas húmidas e a divulgación a través de percorridos medioambientais do programa Camiño a Camiño.

Descargar poster